ڕێوڕەسمی ساڵانەی ڕێزلێنان لە نایابیی ئەکادیمی و بەرهەمداریی زانستی لە پەیمانگەی تەکنیکی کوردستان
کتێبخانە لە وێبسایتی بەرێوەبەرایەتییەکاندا پلەی دووەمی بەدەست هێنا
KTI
(٥ی شوباتی ٢٠٢٦) لە مەراسیمێکدا بە ئامادەبوونی پ.ی.د. ڕێبوار ملا نبی، ڕاگری پەیمانگەی تەکنیکی کوردستان و ئەندامانی ئەنجومەنی پەیمانگە و مامۆستایان و فەرمانبەران، مەراسیمی ساڵانەی ڕێزلێنان لە ستافی زانستی و ئەکادیمی پەیمانگە بەڕێوەچوو.
لە سەرەتای مەراسیمەکەدا، پ.ی.د. ڕێبوار ملا نبی، ڕاگری پەیمانگە، وتارێکی پێشکەش کرد و تێیدا تیشکی خستە سەر ئەو دەستکەوتە مێژوویی و نێودەوڵەتییانەی کە پەیمانگەی تەکنیکی کوردستان لە ماوەی ڕابردوودا بەدەستی هێناون، بەتایبەت جێگیربوونی ناوی پەیمانگە لە ڕیزبەندییە جیهانییەکانی وەک "تایمزی بەریتانی"و چەندین ناوەندی دیکە.
ڕاگری پەیمانگە جەختی لەوە کردەوە کە توێژینەوەی زانستی بڕبڕەی پشتی پێشکەوتنی هەر ناوەندێکی ئەکادیمییە و ڕایگەیاند: "ئێمە تەنها لەم ئاستەدا ناوەستین، بەڵکو ستراتیژی داهاتوومان کارکردنە بۆ بەدەستهێنانی دەستکەوتی ئەکادیمی گەورەتر لەسەر ئاستی جیهان، ئەمەش تەنها بە هەوڵ و شەونخونی توێژەرەکانمان بەدی دێت."
لە بەشێکی مەراسیمەکەدا، خەڵاتی ڕێزلێنان و سوپاسنامە بەخشرا بە کتێبخانەی پەیمانگە وەك دووەم چالاکترین وێبسایت لە سەرجەم بەڕێوەبەرایەتییەکاندا کە لە ساڵی ڕابردوودا جێپەنجەیان دیار بووە لە زۆرتین چالاکی وێبسایتیدا.
ئەم مەراسیمە وەک نەریتێکی ساڵانەی پەیمانگەی تەکنیکی کوردستان ئەنجام دەدرێت، بە ئامانجی هاندانی ستافی ئەکادیمی بۆ بەردەوامبوون لە داهێنان و بەرزکردنەوەی ئاستی زانستیی هەرێمی کوردستان و ناساندنی تواناکانی ناوخۆ بە ناوەندە زانستییەکانی جیهان.
لە کۆتاییدا، پەیمانگەی تەکنیکی کوردستان دووپاتی کردەوە کە هەمیشە پشتیوان و هاوکاری توێژەرانی دەبێت بۆ ئەوەی پەیمانگەکە وەک سەکۆیەکی پێشەنگ بۆ زانست و تەکنەلۆجیا بمێنێتەوە.
